*Steirabluat* 

                               (Dialekt II)

Des letzte Moi da hat’s geheißen,

i soll ma dichterisch nix scheissen

und öfter moi in Mundoart schreibm,

wal imma Hochdeitsch is zum Speibm.

Na gust, dann bin i holt so frei

und schreibs Gedichterl ollawei,

so wia mas spricht in unserm Land,

und gib dem Reim a steirisch Gwandt.

Ma muass net nur des Brauchtum pflegn,

 na a die Sproch derf net vergehn.

Es werd sein Grund hom, dass die Leit

Dialekte hom seit ewger Zeit.

Wal nix is mehr so hoamatlich,

ois wenn ma so wiad Oma spricht.

Ma Wörta nimmt, di ma holt kennt,

und ois wia mas gwohnt benennt.

So wia ollwei ma hot gsogt,

ma hot beim Redn sie net plogt

und afoch aussalossn ois,

wias an holt eingfoin is domois .

Vastaundn hots imma a jeda,

und worst net a gonz a Bleda,

host zruckgredt imma a recht gscheat,

 und net long do umma great.

So woars hoit in der oidn Zeit

und mancherorts hearst as no heit.

Wann d‘Leid redn, wias es gelernt hom hoit,

 eahna dabei nix obifoit.

Wers net vasteht, der hot hoit glocht

und für den wors a net docht.

Wal sowos lernan, is recht bled.

Des host im Bluat - oda a net!

            DerPoet  (11/19)