Da Zaubalehrling

Da Zaubalehrling (Variante nach J.W. Goethe)

Am Freida wars, im gresstn Stress
In Wean, da war a Zauberkurs
da war  mei Chef auf an Kongress-
den er oilweil leitn muaß.

Und i war wieder gaunz alloa
mit Retorten, Eprouvetten
überleg´was soll i toa
mit de Trichter und Pipetten.

Drum hab i was ausprowiert,
im Labor der Schwefi-Grücherl
ghofft, dass a was Brauchbars wird
mit so Zauber-Profi-Sprüchal.

Mei Boss hat gmoant i soill oiss putzen
da hängat i woi hibsch laung drau,
drum wollt i´a des Zaubern nutzen
mit a paar Zeiln, de i nu kau!

Nimm in Chef sein Zauberhuat
und de greßan drei Küvettn
und dazua a Katznbluat
va da Nachbartskatz, da fettn.

Hat net passt, des mitn Bluat,
drum hab i a Wassa gnumma
und i schau, was si hiaz tuat
nach drei Sprichal is was kumma:

Pritschel, pritschel, rinn dahi
rinna sollts, was´s rinna kau
schleda, bis i ferti bi
und daunn bist zan Putzn drau !

Also kimm, du Reiser-Feger,
mach oiss auba, schrubb und wisch,
bist ab jetzt mei Bodenpfleger
putz des Pflaster bis zan Tisch.

Tua jetzt, was i wü va dir!
Du bist hiaz mei  Avatar
und ab jetzt, da folgst du mir,
wia waunns nie net aundas war!

Kaunnst schau starten- oiss wird gwischt!
Rennt in oana Tour zan Bach .
Im gaunzn Haus hats gwettat, zischt
dauernd kimmt a Wassa nach.

So hiaz tuats si´s laungsaum, halt, bleib steh!
Kau mei Häfa net pariern?
wü nu weida pritscheln geh
Muaß an Stoppspruch ausprobiern!

Fetzn, Besen, Wassakübi -
bremsts eng ei, sads laungsaum stü!
Machts herinnen ja koa Übi
und tats brav des, was i wü !

Stopp und Pause, halt und Schluss
herts jetzt auf, es is schau gnua!
Machts ma ja heit koan Vadruss,
drahts sofort des Gwassrat zua!

Mei, de folgn net, machan weida!
I steh schau in Wassa drin,
hoil ma d´Stüfin, is des gscheida,
bevor i naß in Fuassn bin.

Was tua i da in so an Fall?
I woaß ma wirkli jetzt koan Rat
Wia war des ban letztn Mal?
Wia da Chef oiss klar gmacht hat?

I wü grad mei Handy holn
kimmt er eina bei da Tir.
„Hättst leicht selba zaubern wolln?“,
sagt er vorwurfsvoi za mir!

Und daunn sagt er: Schnell ins Eck!
Wasser stopp-und oiss beenden!
Avatar und Fetzen weg!
I alloa derf eich verwenden!

Und gaunz streng durch seini Brülln
sagt er nu zan Zauberbuam:
„Tuast nu was gegen mein Wülln,
mach i aus dir a Zuckerruabn !

Lass da oans  va mir nu sagn-
a in unsra Zaubarei
 hoaßts , zerscht  in Moasta fragen,
erst daunn bist selber a dabei!

G.S.
Sept.26